U-Kiss លេខ១​ក្នុង​តារាង​អាស៊ី​អាល្លឺម៉ង់

កាល​ពី​ពេល​ថ្មីៗ​នេះ ​ក្រុម​ចម្រៀង U-Kiss បាន​ជាប់​ចំណាត់​ថ្នាក់​លេខ ១ នៅ​​ក្នុង​តារាង​ចំណាត់​ថ្នាក់​បទ​ចម្រៀង​អាស៊ី​អាល្លឺម៉ង់ (German Asian Music Chart)។

យោង​តាម​ផលិតកម្ម NH Media ​បាន​ឲ្យ​ដឹង​​កាល​ពី​ម្សិល​មិញ​ថា U-Kiss បាន​ជាប់​ចំណាត់​ថ្នាក់​លេខ ១ ក្នុង​តារាង​ចំណាត់​ថ្នាក់​បទ​ចម្រៀង​អាស៊ី​អាល្លឺម៉ង់​កាល​ពី​ខែ​ឧសភា​កន្លង​ទៅ​នេះ​ តាម​រយៈ​បទ​ចម្រៀង​របស់​ពួក​គេ​មាន​ចំណង​ជើង​ថា “Doradora” នៅ​ក្នុង​អាល់ប៊ុម​​ខ្នាត​តូច​ទី​៦​របស់​ពួក​គេ​ដែល​​ចេញ​កាល​ពី​ខែ​មេសា។

ចំណែក​ឯ បទ​ចម្រៀង​ “Fantastic Baby” របស់​​ក្រុម​ Big Bang បាន​ជាប់​ចំណាត់​ថ្នាក់​ទី២​ខណៈ​ពេល​ដែល បទ​ “Power” របស់​ក្រុម​ B.A.P ជាប់​លេខ ៣។ បទ “It’s a War” របស់ MBLAQ លេខ ៤ និង “Volume Up” របស់ 4minute ជាប់​លេខ ៥។

បទ  “Doradora” របស់  U-Kiss ​និពន្ធ​ដោយ​ផលិតករ  Kim Hyun Seok និង​ Brian Kim ។ ប៉ុន្តែ​មិន​ត្រឹម​តែ​បទ​ចម្រៀង​មាន​ភាព​ពេញ​និយម​នោះ​ទេ សូម្បី​តែ​អាល់ប៊ុម​​របស់ U-Kiss ក៏​លក់​ដាច់​បាន​ច្រើន​គួរ​កត់​សម្គាល់​ដែរ។

ក្រុម​តារា​ចម្រៀង​ U-Kiss មាន​គម្រោង​​ធ្វើ​​ការ​ប្រគំ​តន្ត្រី​ទេសចរណ៍​ ​នៅ​ក្នុង​ទីក្រុង​ចំនួន ៩ នៅ​​ប្រទេស​ជប៉ុន​ដើម្បី​ចូល​រួម​ក្នុង​កម្ម​វិធី​តន្ត្រី a-nation ដែល​ជា​កម្ម​វិធី​តន្ត្រី​​ធំ​ជាង​គេ​បំផុត​​នា​រដូវ​ក្ដៅ​នៅ​ក្នុង​ប្រទេស​ជប៉ុន។ សម្រាប់​ប្រទេស​កម្ពុជា U-Kiss នឹង​មក​សម្តែង​នៅ​មជ្ឈមណ្ឌល​សន្និបាត និង ពិព័រណ៍​កោះ​ពេជ្រ​នៅ​ថ្ងៃ​ទី ១៨ ខែ មិថុនា ខាង​មុខ​នេះ។